A Organización Mundial do Turismo das Nacións Unidas (OMT) convídanos a celebrar o 42º Día Mundial do Turismo, este 27 de setembro, baixo o lema “Turismo para un crecemento inclusivo”.

‍

‍

Desde a Federación Galega de Turismo Rural (FEGATUR) sumámonos con renovada esperanza á dita celebración. Con ledicia percibimos a enorme capacidade do sector para impulsar un desenvolvemento inclusivo no campo galego, promovendo o respecto polas persoas, á vez que é quen de xerar oportunidades para moitas delas.

Paseniñamente e dun xeito calado, en moitas das nosas aldeas e vilas, o turismo rural ven sendo exemplo vivo e afortunado do reclamado desenvolvemento inclusivo.

Sexa cal sexa a actividade turística na que as persoas esteamos implicadas, somos convocadas a colaborar man con man a favor dun turismo que procure unha economía xusta e integradora, que respecte ás persoas e ao medio natural. Só un turismo consciente, responsable, sostible e resiliente poderá contribuír a un mundo no que cada persoa se sinta plenamente realizada.

Tal e como nos apremia a OMT, só unha economía respectuosa e xusta, contribuirá ao benestar social eeconómico da humanidade, dándolle asía oportunidade a todos os pobos de procurarse o seu desenvolvemento integral.

Urxe deixar de fomentar modelos de produción, consumo e goce que comprometen o futuro e destrúen os limitados recursos do planeta e aos que tan só poden acceder unha privilexiada minoría.

Hoxe en día, lonxe de voltar á mesma falsa seguridade das estruturas anteriores, precisamos con urxencia modelos e sistemas que sexan accesibles e respondan ás necesidades básicas da vida das persoas .

É unha prioridade absoluta e inaprazable, tamén para o sector do turismo rural de Galicia, concienciarnos que as persoas e os territorios temos un destino común e que, fronte ao individualismo e o pecharse en muros que a nada bo conducen, debemos esforzarnos sen máis dilación sen impulsar estilos de vida e traballo respectuosos, colaborativos e solidarios.

É a hora das persoas.

 Unha vez máis faise precisa a colaboración e cooperación de toda a comunidade, sexamos persoas autónomas ou empresarias, servidoras públicas, traballadoras nas administracións, institucións, colectivos ou asociacións. En suma de cantas esteamos dispostas. Todas ao servizo da xente. Cada quén coa súa responsabilidade e os seus recursos, evidentemente, escoitando e acordando, por suposto, mais cooperando coa comunidade e procurando que ninguén se quede fóra.

Confiando que cada vez máis persoas están a tomar conciencia de que tanto a situación sanitaria como o colapso ambiental que sobrevoan sobre toda a humanidade son realidades que debemos afrontar xuntas e sen demora, na FEGATUR reafirmamos ante todo, o valor dapersoa e da dignidade humana, máis alá da burocracia, as estatísticas e os números da economía turística. Así mesmo, comprometémonos a seguir procurando e alentando propostas turísticas que permitan o encontro entre persoas, entre territorios, a fomentar a xestión e o gozo do patrimonio e do lecer e a favorecer estilos de vida respectuosos con todas as criaturas que habitamos esta Terra.

Alentamos o exercicio da creatividade que permita explorar novos camiños e abandonar sendeiros que a nada bo levan. Temos un destino común, como acotío a teimuda realidade nolo ven amosando.

O   noso agradecemento a toda a boa xente que continuades apoiando e escollendo o turismo rural de Galicia para o voso lecer e descanso. Sodes o exemplo desa nova fraternidade capaz de axudarse e estimarse mutuamente, que vai naprocura dese desenvolvemento inclusivo que, sen demora, tanto precisamos.

Francisco Xabier Almuíña Chorén. Presidente da Federación Galega de Turismo Rural

‍